Wednesday, December 31, 2014

සමාන්තර විශ්වයක ගැයෙන සමුගැනීමේ ගීය...! Good bye Mr.


උපනෙමි ඔබගෙ කුස මෙලෙසින් පිරි රුසිරු
දැරුවෙමි කිරුළ විදිමින් සැම රජ ඉසුරු
සුරකිමි ඔ‍බගෙ දරු කැල බිදිමින් සතුරු
හැරයමි අද දුකින් ඔබ ලක් මවුණි ගරු

නොවහිම් යසස් දැරු සිරිලක් මෑණියනි
නමදිමි මහත් ගුණ ඔබ සිහිකර නිතිනි
රජකම් කලත් කලකම් පලදෙන බැවිනි
මෙතරම් දුකක් සිදුවිය මගෙ පෙර පවිනි

අහෝ! ගනදුරයි අද පෙරදිග මැණික
හො හෝ හඩ නැගෙයි හදවතෙහි ටික ටික
සහෝදර පිරිසගෙන් පැමිණි මේ දුක
කොහෝමත් විදිමි මම සතුටින් නිසැක

විකුම් සිහල පරපුර සිහි තිබෙන තුරු
උතුම් රාජ ලේ ටික මගෙ සිදෙන තුරු
නෙතින් කදුලු නොහෙලමි දිවි ති‍බෙන තුරු
ඉතින් ආයුබෝවන් ලක් මවුණි ගරු



ස්වකීය අව රාජ්‍යතාන්ත්‍රික දැණුම සහ අත්දැකීම් මඳකම නිසාම සිංහලද්වීපය සහ රාජ්‍ය පාළනය අවුලෙන් අවුලට පත්කරමින්, බ්‍රිතාන්‍යන්ගේ පිහිටෙන් පණ බේරාගත් සිංහලේ අවසන් රජුට සිතුනායැයි හැඟෙන මේ කතෘ අඥාත කවි පන්තිය ඔබ මෙයට පෙර අසා ඇතිබවට සැකයක් නැත!

නුදුරේදීම කැබලි වී, තවත් එක් මුස්ලිම් කොදෙව්වක් වන්නට තිබූ රටක්, ඒ විනාසයෙන් බේරීමේ දෛවෝපගත සිදුවීම් පෙළකට මඟ හෙලිකරමින්, මෙම කවි සිතින් ගයමින් ඒ අමන රජු ලංකාවෙන් පිටව යන මොහොතේ සමාන්තර විශ්වයේ වෙනත් තැනෙක අපූරු සිදුවීමක් සිදුවෙමින් තිබින.

ඒ සින්ග්ලංකා නම් දූවක, 2015 ජැනුවරි 13 නම් දිනක් දැක්වෙන සන්ධ්‍යාවෙකි. බැසයන හිරුත් සමගම එරටෙහි දකුණු දිග වෙරලාසන්නයෙන් ඈතට ඇදෙන, තරු ලකුන ගත් යුධ නෞකාවෙක ආරක්ෂාව සහිත සුඛෝපභොගී යොට් යාත්‍රාවෙක තට්ටුව මත, මඳක් බමණ මතින්, මධුවිතක් අතැතිව සිටින අඳුරු වතින් යුත් ප්‍රතාපවත් පුරුෂයෙකි.

ඔහුට මඳක් ඈතින් බිළාලයකු සිහිකෙරෙන වතින් යුත්, හඬමින් සිටින කාන්තාවට පමණක් නොව ඈතින් පාවෙන නෞකාවේ සිටිනා නූස් කහපැහැති මිනිසුන්ටද ඇසෙන සේ හේ යම් ගීයක් බෙරිහන් දෙයි.


සැයු. මේ අපට සමාන්තර විශ්වයක 1816 ජනේරු දිනෙක සිදුවූ සිදුවීමක් බව නැවත සිහිතබාගන්න.


මෛත්‍රී........ මෛත්‍රී........
ඔබව අමතක වෙන්නෙ නෑ
මෛත්‍රී........ මෛත්‍රී........
ආයෙ මම මෙහෙ එන්නෙ නෑ
ඔබ දකින්නට වෙන්නෙ නෑ....

ඔබෙ රට සිරි ලංක දූවයි හරිම අලංකාරයි
මගේ රට දැන් සුවාලන්තය මට හරිම ආසයි

දිනල යුද්ධය, ඔබේ රට හැර - ආවෙ මෙහේ රටටයි
ගහපු සල්ලිත්.. තියල ආවෙ මම -  දිනෙක යළි එන්නයි

දැන් යුද්දෙ අවසාන උනා...
මට යලි එහෙ යන්න උනා

මෛත්‍රී...මෛත්‍රී.....

පිල්ලු කොටියෙදි සවස් කාලෙට - පවුල එකතුවෙලා
අනාගතෙ ගැන සිහින මැව් හැටි - දුකයි මතක් වෙලා

රටේ බූරුවො, ඔබට හැර රට - දෙන්න බැහැ කියලා
කිව් නිසයි මගෙ, ආදරියෙ මම -  යන්නෙ ඔබ දාලා

දැන් යුද්දෙ අවසාන උනා....
මට ඔබ හැර යන්න උනා...

මෛත්‍රී...මෛත්‍රී...

ඔබ වගේ මම, මගේ මව්පියො - දෙගුරුන් සලකනවා
ඔබ වගේ මම, මගේ රටටත් - ජීවිතේ දෙනවා
ඔබ වගේ මම,  මමත් ඔබ ගැන - කඳුලු වගුරනවා
ගඟට කැපු ඉනි, දිහා බලලා - පසුතැවිලි වෙනවා

දැන් යුද්දෙ අවසාන උනා....
මට ඔබ හැර යන්න උනා...

මෛත්‍රී...මෛත්‍රී...
මෛත්‍රී...මෛත්‍රී...


ආස්චර්‍යකින් මෙන් ඒ ගීයෙ තනුවට හා පදවලට සමාන තවත් ගීයක්, ඊට වසර එකසිය පණහකට පමන පසු එළඹෙන දිනෙක, එවකට සිලෝන් නම් ලත් දිවයිනෙහි MS නම් ගායකයෙක් ගයන්නේය. ඒ MS ගේ ගීතය ඔහුගේ පුතෙකු විසින් ඊටත් පසුව ගැයූ අයුරුයි මේ.


ඔබ සැමට එළඹෙන 2015 වසර සුභ නව වෙනසක් වේවා....!

Friday, December 26, 2014

කළවානට ආ සුනාමිය....How Tsunami hits Sinharaja rain forest…!




 ජීවිතය යනු පුදුමයන්ගෙන් පිරුණු තැනකි!

අදින් වසර දහයකට පෙර ආ සුනාමිය ගැන, එයින් වූ හානි ගැන පොදුවේ සහ පුද්ගලිකවම වූ බලපෑම ගැන ඇති පදම් ලියැවී තිබේ. මමද ලිව්වෙමි.

මේ එවන් සුනාමිය නිසා වූ සෘජු හානියක් ගැන විස්තරයක්, කථාන්තරයක් නොවේ.

හරි පුදුම ජීවිතයේ සමුගැනීම් මෙන්ම හමුවීම්ද ඇතිවන්නේ නොසිතන විදිහටමය.

මෙයට දස වසරකට පෙර, යම් කිසි පිනකින් සුනාමි ව්‍යසනයෙන් ගැලවීමට හැකිවීම ගැන මා පෙරත් කීවෙමි. ඒ, වාර්ෂික විනෝද චාරිකාව යාමට දකුණු ලක මුහුදු තීරයේ හෝටලයක් සොයා ගන්නට නොහැකි වීම නිසාම, අකමැත්තෙන් මුත් සිංහරාජ මායිමේ වැද්දාගල ඉකෝ ලොජ් එකකට ගාල් වූ කථාවයි.
 
අප ගිය මේ සුන්දර ස්ථානය, සැබැවින්ම නිවාඩුවකට කියාපු තැනකි. එහි බාහිර කරදර, රූපවාහිනි මලදාන, විදුලිය පමණක් නොව එකලනම් ජංගම දුරකථන සඥාද නොතිබුනි. එපමණක් නොව, ප්‍රධාන මාර්‍ගයේ වාහන නවතා, සොඳුරු අඳුරු වනපෙතක් මැදින් කිලෝමීටර භාගයක් පමණ ඇතුලට වන්නට, පාගමනින් පමණක් යා හැකි තැනෙක ඉතා සිහිල් ගලා යන දොළ පහරක් අසබඩ මේ කදිම නවාතැන පිහිටා තිබුනි.


ඒ දොළ පහරෙහිද මඳක් විශාල වක්කලමක් සෑදී තිබූ නිසා එය තවත් අගනා ස්වභාවික තටාකයක් විය. දොළ පහරින් එගොඩ වූ ගසක් හරහා කඹයක් බැඳ, ඒ මතින් යන්නට, ගස් අත්තක් උඩ සිට වතුරට පනින්නට, ගෙන ගිය රබර් ටියුබයන්ට බැස දොලේ පාවෙන්න්ට, ඈ මෙකී නොකී ජල ක්‍රීඩාවන්ට ඉතාම ආරක්ෂිත සහ ආකර්ෂනීය එවන් ස්ථාන මට හමුවී ඇත්තේ කිහිපයක් පමණි.


එපමණක් නොවේ! දොළට  ඉහලින්, කන්ද කපා සාදා තිබූ පිටිය දහවල ක්‍රිකට් ක්‍රීඩාවටත් රාත්‍රයියේ ගිණිමැලයක් වටා වාඩිවී ගී ගයා නැටීමටත් කදිම තැන්නකි. අසල අපේ හඬ අසන්නට ඇත්තේ වල් සතුන් පමණක් නිසා, අපි වල් සතුන් මෙන් එහි ගී කියමින් සතුටු වුනෙමු.


සරළ, එහෙත් අවශ්‍ය සියළු පහසුකම් සහිත වූ, කන්ද උඩට වී තිබූ කාමර, ඉතාම අගනා සහ වෙනත් තැනෙක නුදුටු කළාත්මක සිවිලිමක් සහිත පිහිටි ගල් මේස සහ පුටු බවට පත්කල භෝජනාගාරය, ගං ඉවුරේ වූ ටෙන්ට් සහිත කෑම්ප් සයිට් එක, ඒ සියල්ල සමඟ ආ රසවත් ගමේ කෑම...! මොන අඩුවක්ද?

අකමැත්තෙන් මෙන් සුනාමිය නිසා හනික ආවා මිස, හැකිනම් වැඩිපුරත් රැයක් එහි සිට එනතරමට අප කා හටත් හිතට ඇල්ලූ ඒ අති සොඳුරු නවාතැනට නැවත යාමට මම බොහෝ කල් සිට සිතා සිටියෙමි.

එදින, අප එම නවාතැනේ සිටියදීම එහි පැමිණි, සිහින් උස සිරුරක් සහිත් සුහද පුදගලයකු වූ එහි හිමිකරු, අප සිංහරාජ නැරඹීමට ගොස් එන අතරතුර, සුනාමි ආරංචිය නිසාම පිටව ගොස් තිබුනි.



පසුදින අපද ඉන් පිටවිය.

ඉන් පසුත් "සිංහරාජ ඉකෝ ලොජ්" පිළිබඳ මතක ගිලිහුනේ නැති වූද, එය සොයා එහි යාමට අවස්ථාවක් නොලද්දෙමි. නමුත් එහි අසිරිය, රසය අප සමග එහිගිය මා, නාළක ඇතුළු අප සැම සිත්තුල සදා රැඳී තිබුනි.

දස වසරකට පසු, එදා කඩිමුඩියේ පිටව ගොස් තිබූ, දිනෙක හමුවන්නට බලා සිටි හිමිකරු යළි හමුවිය.

සත්‍යලෙසම කිවහොත්, අප හමුවී බොහෝ දිනක්, කතාබස් කලද මේ මා ආශාවෙන් සිහිපත් කල ඒ සොඳුරුනවාතැනේ හිමිකරු තමා යැයි ඔහු කීවේ නැත.

නමුත් එක් අහඹු කතාවක් ඇදී ගොස්, අවසන ඔහු ඒය තමාගේ යැයි කීහ.

එය සත්‍ය ලෙසම සතුට ගෙන දෙන ආරංචියක්ම වන්නේ නොවේද? නැත, ඉන් මොහොතකට පසු ඔහු කී දෙයින්, ඒ සතුට සුණු විසුණු විය!

ඒ, සිංහරාජ රේන්ෆොරස්ට් ඉකෝලොජ් හි අවසාන අමුත්තන් අප වූ බැව් ඇසීමෙනි!

සුනාමිය, කළුතර පයාගල මුහුදුවෙරළට ඔබ්බෙන්, කළවාන වැද්දාගලට වැදී ඇති බව කෙලෙස සිතන්නද? සුනාමිය පැමිණ තලා පෙලා දමා තිබුනේ සිය පයාගල නිවස පමණක් නොව, ඒ සමග බිඳ වැටුණු සංචාරක ව්‍යාපාරය විසින් ඒ වනවිට පීදෙමින් තිබූ සිංහරාජ ඉකෝ ලොජ් පවා තලා දැමීයයි ඇසීමම දැඩි කම්පනයක් ඇතිකල පුවතක් විය!

දැන් මේ සමස්ථ කතාව ඔබට වැදගත්වන්නේ ඇයි? එහි ඇති මාකියූ පුදුමය කුමක්ද?

පුදුමය, ඔහු මට දසවසරකට පසු හමුවන්නේ බ්ලොග් පිටු අතරින් වීමයි!

පිරුණු කලේ හඬ නැත. ඉතා නිහඬ නමුත් හොඳ හඬක් ඇති, සංචාරක ක්ෂේත්‍රයේම රජයේ ඉහල තනතුරක් දරන මේ සොඳුරු මිනිසා, දම්පාට දේදුන්න ලියූ ජීවන, මේ දෙසැම්බර් 26 දින සටහන උඹ වෙනුවෙන්මයි.!

පුලුවන්නම් අපි ආයි ඉකෝ ලොජ් එක පටන් ගමු, මේ බ්ලොග් වල, මූණු පොතේ, හොරකම වෙනුවට හොඳනම විකුණන්න හැකි උඹට උදව් කරන්න බොහොමයක් මිනිස්සු ඉන්නව.

හැබැයි, ඒ සේරටම කලින් ආයි බ්ලොග් එක ලියහන්...මොකද සිංදු ගැන ලිව්වට සංගීතෙ ගැන ලියන්නෙ නෑ කවුරුත්.

මේ පින්තූර සිංහරාජ ඉකෝ ලොජ් එකේදි මා ගත් ඒව නොව ජීවනගේම මූණුපොතේ ඇලබමයෙන් හොරාගත් ඒවාය.

Tuesday, December 23, 2014

අපි අසරණ වෙලා වගේ... හිතට දැනෙනවා.....!






පෝස්ට් එක කියවන්න මේ පාරෙන් එන්න

අපි අසරණ වෙලා වගෙයි හිතට දැනෙනවා.....! Brutal attacks of Sri Lankan police



අපි දන්නා ඉතිහාසයේ මැතිවරණයක් ප්‍රකාෂකර ඇති මොහොතක වෘත්තීය ආයතන සහ ශිෂ්‍යය ගැටුම් හැකිතරම් සාමකාමීව විසඳගැනීමට බලයේ සිටින ආන්ඩුව උත්සාහ ගත්තේය. ඉල්ලීම් නොදිය හැකිනම් අඩුමතරමේ ඡන්දය ඉවරවනතුරු කල් ඇදීමේ උපක්‍රමයක් හෝ ක්‍රියාත්මක විය.

නමුත්, ඉතිහාසයේ අතිශය තීරණාත්මක ගල උඩ මැතිවරණ සටනක අභිමුව පවතින් රජය හැසිරෙන්නේ එයට හාත්පසින්ම වෙනස් ලෙසකිනි.

පහත ඡායාරූප සියල්ලම පසුගිය දින කිහිපයක් තුල, දේශපාලනික නොවන උද්ඝෝෂන වෙනුවෙන් රජයෙන් කල පිළිතුරු සැපයීම්වේ.

කොටින්ම මේවා මැතිවරණ ප්‍රචන්ඩ ක්‍රියානම් මුග්ධ ක්‍රියාවලට එහා ගිය, රජයේ සෘජු ප්‍රචන්ඩත්වය ජනතාව මත මුදාහැරීම්ය!

මට ඇති බිය සහ මෙහි වඩා තැතිගන්වන කරුණ වනුයෙ, ඡන්දයට පෙර මෙහෙමනම්, ඡන්දෙන් පසු, එනම් මේ ආන්ඩුවම දිණුවෝතින් ඉන් පසු ඔවුන් අප මුදා හරින භීෂනය කෙතරම් ප්‍රභල විය හැකිද?

බලය උරගා බලන, මිනිසුන්ගේ අවධානය සහ කැමැත්ත ඉතා තීරණාත්මක මොහොතක මෙලෙස හැසිරෙන, යුධ අපරාධ වලට දේශීයව දන්ඩුවම් දෙන ක්‍රමයකට පවා විරුද්ධ පාළකයනි පිරිසක් වෙතින් අනාගතයේ අපට මොනවා ලැබෙනු ඇතිද?










පිහිටක් නෑති සරණක් නෑති
සතුටක් ඈති මුහුණක් නෑති
මේ සසර දනව්වේ
අපි අසරණ වෙලා වගෙයි හිතට දැනෙනවා
බුදුහාමුදුරුවනේ . . .


හබලක් නෑති ඔරුවක් ඈති
මිනිසුන් වෙති වෙරළක් නෑති
මේ සසර දනව්වේ
අපි අසරණ වෙලා වගෙයි හිතට දැනෙනවා
බුදුහාමුදුරුවනේ . . .

නිවනක් ඈති ගෙදරක් නෑති
ගමනක් වෙති වෙහෙසක් නෑති
මේ සසර දනව්වේ
අපි අසරණ වෙලා වගෙයි හිතට දැනෙනවා
බුදුහාමුදුරුවනේ . .

පින්තූර ලංකා ඊ නිව්ස් වෙතිනි.

Monday, December 22, 2014

මාර සිරා වැඩ!



මේ ඇවිත් තීන්නෙ ඉතිහාසෙ මාර සිරා මැතිවරණය!

මේකෙ ප්‍රධාන අපේක්ෂක මරා ( මහින්ද රාජපක්ෂ ) සහ අනෙක් පැත්තෙ සිරා ( මෛත්‍රිපාල සිරිසේන ) මාර සිරා ආතල් දෙමින් කරට කර ගේමක් දෙනව පේනව.

මම කොහොමත් සිරා පොර නිස මට මරාගන්න යන්න කැමැත්තක් ඇත්තෙම නෑ.

ඒ එක්කම  සිරා වැඩ දාල ගේම දිනල මරානොගෙන ඉන්නවනං තමයි මම කැමති.


ඉතින් මේ සිරා ඡන්දෙ නිව්ස් බලනකොට පෙනිච්චි මරාගෙන කන්න හිතෙන සීන් කීපයක් මේ.


November 1,  පොදු අපේක්‍ෂකයා මමයි – රනිල්

November 5,  රනිල් ජනාධිපති අපේක්ෂකයා ලෙස තීරණයක් නෑ.. මංගල රැකගැනීම නායකත්වයේ වගකීමක්

November 8,  පොදු අපේක්‍ෂක තේරීමේ අවසන් වටය ඇරඹේ.. අවසන් සිවු දෙනා මෙන්න.. මාදුළුවාවේ සෝභිත හිමි,  හිටපු ජනාධිපතිනි චන්ද්‍රිකා බණ්ඩාරනායක කුමාරතුංග, රනිල් වික්‍රමසිංහ හා කරු ජයසුරිය යන සිව් දෙනාගෙන් අයෙක් ඒ සඳහා තෝරා ගැනීමට නියමිතය.

November 9,  පොදු අපේක්‍ෂකයාට ජනපතිගෙන් සුභ පැතුම්. ජනාධිපතිවරයා විසින් දුරකතන ඇමතුමකින් ජයසූරිය මහතා වෙත මෙසේ සුභ පැතුම් එක්කකර ඇත.

November 14,  නමක්, ගමක්, පාටක් නොදන්න පොදු අපේක්‍ෂකයා ගැන විපක්‍ෂය අවබෝධතා ගිවිසුම් ගහයි

November 17,  පොදු අපේක්ෂකයා ගැන බෙදීමක්! ගිවිසුම අත්සන් කිරීම දිනනියමයක් නැතිව කල්යයි!!"

November 21,  එළැඹෙන ජනාධිපතිවරණයේදී විපක්‍ෂයේ පොදු අපේක්‍ෂකයා ලෙස ඇමති මෛත‍්‍රීපාල සිරිසේන මහතා නම් කිරීමට එක්සත් ජාතික පක්‍ෂයේ පාර්ලිමේන්තු මන්ත‍්‍රි කණ්ඩායම, පළාත් සභා විපක්‍ෂ නායකයින් සහ G-20 කණ්ඩායම එකඟතාවය පල කර තිබේ.

December 22,  සිරිසේන ජාතියම පාවා දේ.. හොර ගිවිසුම මෙන්න.13 ඉක්මවා බලය බෙදන්න, උතුරෙන් හමුදා කැඳවන්න, යුධ අපරාධ පරීක්‍ෂණය සූදානම්  (අත්සන් කර ඇත්තේ නොවැම්බර් 1 වෙනිදා!! - අපොයි මන්දබුද්ධික අංශ සහ යුද්ධ වීරයෝ )


මෙන්න තවත් සීන් එකක්

December 5,  බදුර්දීන්ගේ පක්‍ෂය අස්වර්ගේ මන්ත‍්‍රී අසුන බාර ගනී..තම පක්‍ෂය ජනාධිපති මහින්ද රාජපක්‍ෂ මහතා සමඟ පැවැත් වූ සාකච්චාවකින් පසු මෙම තීරණය ගත් බව එම පක්‍ෂ නායක රිෂාඞ් බදුර්දීන් මහතා සඳහන් කරයි.

December 22,  පොදු අපේක්‍ෂක මෛත‍්‍රීපාල සිරිසේනට සහාය දීම සඳහා ඇමති රිෂාඞ් බදුර්දීන් තීරණය කර ඇත. ( අය්යො අස්වර්ගෙ මන්ත්‍රීකම )


මේක තවත් සිරා සීන් එකක්


November 24, ආණ්ඩුවෙන් ඉවත් වී ගිය පිරිස් සම්බන්ධ රහසිගත ලිපි ගොනු තමා සතුමුත් ඒවා කිසි දිනක හෙළි නොකරන බව ජනාධිපති මහින්ද රාජපක්ෂ මහතා පවසයි.


December 5, ඇමතිවරුන් කැබිනට් එකට එවන ෆයිල් තියෙනවා. මම කිවෙ ඒ ෆයිල් ගැන. කැබිනට් පේපර් එකක් එළියට දාන්න බෑනේ. ඒවා රහස්නෙ -  ජනාධිපති මහින්ද රාජපක්‍ෂ




 තවත් සිරා සීන් එකක්


November 21, ජනාධිපතිධූරය දින 100 න් අහෝසි කරන පොදු අපේක්ෂකයා ලෙස මෛත්‍රීගේ ජයග්‍රහණයට කැපවෙන්න එජාපය ඒකමතිකව තීරණය කළා: රටේ පොදු යහපතට කළ විශාල පරිත්‍යාගයක් -තිස්ස  අත්තනායක

December 19,  විපක්‍ෂයේ පොදු අපේක්‍ෂක සිරිසේන මී පැටියෙක්.. ජනාධිපති පරද්දන්න හීනෙන්වත් බෑ – තිස්ස අත්තනායක"

පහුගිය නිව්ස් ආයි බැලුවම මෙහෙම බුදු සිරා කතා මහ ගොඩක් දකින්න පුලුවන්. වැඩේ තීන්නෙ, මරාගන්න ඉන්න උන්ට පේන්නෙ සිරා නැති නිව්ස් විතරක් වීම. අනේ ඉතින්, සිරාවට පේන දවසක් මේ මරාගන්න උන්ට කවද එළඹෙයිද?


ඔය සේරගෙන්ම මම කැමතිම මේකට.

December 13,  තමනට ඇමති ධූර හෝ වරප‍්‍රසාද කිසිවක් අවශ්‍ය නැතැයි බස්නාහිර පළාත් සභා මන්ත‍්‍රී උයද ගම්මන්පිල මහතා පවසයි.


November 27, පළාත් සභාව ඇතුලේ ලොකු පෙරලියක් කරන්න හැකියාවක් උදය ගම්මන්පිල ඇමතිතුමාට ඇති කියල මං හින්නෙ නෑ – හිරුණිකා

Thursday, December 18, 2014

ඌවේ ඉන්දක දෙවියන්ගේ අමුතු මුතු!



ඉන්දක යනු ඌවෙ සුප්‍රසිද්ධ නමුණුකුළ කඳු අරක්ගෙන සිටි දේවතාවෙකි. මුතියංගන මහ වෙහෙර "දා- මුතු" නිධන් කරවා කරවනු ලැබුවේ මේ ඉන්දක දෙවිඳුන්යැයි ජනවහරේ එයි.

බ්ලොග් ලොවෙහිද මේ ඉන්දක දෙවි අඩවියෙන් වැඩි මුතු මහ ගොඩකි. ඒ අතරින් බුරා, ඉවාන්, කළ්‍යාණ මිත්‍ර, සින්දු ඇනෝ වැන්නවුන් පෙරමුනෙහි සිටිති.

මේ අදහස ඒ ඌවේ මුතු ගැන කියන්නට නොවේ. ඌවේ සිට ලියන, තවත් ඉන්දක කෙනෙකුගේ අඩවියක් ඔබට හඳුන්වා දෙන්නය.

මා ඇති පදම් බණ්ඩාරවෙල ගොස් ඇත්තෙමි. මා මෙන්ම බණ්ඩාරවෙල ට්‍රිප් යන අපි දන්නේ බණ්ඩාරවෙලට කිලෝමීටර දහයක් පහළොවක් ඈති වන රාවණා ඇල්ල නම් ඇල්ල වැල්ලවාය මාර්ගයේ වූ දිය ඇල්ලත්, හපුතලේ ලිප්ටන් සීට් එක සහ ඇඩිෂම් බංගලාවත් හැර ඒ අවට බලන්නට මෙලෝ මලදානයක් නැති බවයි.

බදුල්ලට යන්නේනම්, සුප්‍රසිද්ධ බෝගොඩ ලී පාළමත්, දුන්හිඳ දිය ඇල්ලත් හැර වෙනත් යමක් බදුල්ලේ නැති බවයි.

නමුත් මා කෙතරම් වැරදිදැයි, ඉන්දක කරුණාදාසගේ මේ බ්ලොග් අඩවිය දුටුවනම සිතුනි.

කොටින්ම අපි රාවණා ඇල්ල නමින් හඳුන්වන, ඇල්ල වැල්ලවාය මාර්‍ගයෙහි වන සුප්‍රසිද්ධ දිය ඇල්ලෙහි සැබෑ නම "බඹරගම ඇල්ල" බවත්, රාවණා ඇල්ල යනු වෙනත් පාරක ගොස් නැරඹිය යුතු දිය ඇල්ලක් බවත් ඔබ දැන සිටියාද?

මේ සැබෑ රාවණා ඇල්ලෙහි ඇති ගුහා, සහ රාවණා විහාරය ගැනත් ඉන්දක ලියා ඇත.

එපමනක් නොවේ. බණ්ඩාරවෙල අවට ඇති තවත් කුඩා අප්‍රකට දිය ඇළි කිහිපයක් ගැනම ඔහු ලියා ඇත.

බණ්ඩාරවෙළ වැළිමඩ පාරේ මා ඥාති සෝවුරියගේ නිවස අසල තිබූ, එවක නම් කෙලින් සිටි අම්බලම, වසර පන්දහසක් පැරණියැයි කියන කුරුල්ලන්ගල ලෙන් චිත්‍ර, මේවා ගැන බණ්ඩාරවෙළ යන හෝ එහි වෙසෙන බහුතරයක් නොදැන සිටින බව මට විශ්වාසය.

එපමණක්ද, බදුල්ලේ ඇති අති සුන්දර අම්බලමක් ගැන මම කිසි දිනෙක අසා නොතිබුනෙමි! බදුල්ලේ වෙලේකඩේ තාරකා කොටුව, බදුලු ටැම් ලිපිය වැනි අප නොදත් දේ බොහෝ ඔහු සැකෙවින් ලියා තිබේ.

මා කපිතාන් රෝගර්ස් රොජර්ස් ගැන වූ "හෙන ගැසීමේ පුරාවෘතය" කිසි විටෙක විශ්වාස නොකලෙමි. නමුත් අලි දහස් ගණනක් මරා දැමූ, හපුතලේදි මිය ගිය ඒ වීර සොල්දාදුවා මලේ හෙනයකිනැයි, ඔහු ගැන සඳහන් කර තිබූ "මේජර් ස්කිනර්" පවා වසං කර තිබුනි. නමුත් රෝගර්ස් රොජර්ස් වෙනුවෙන් සිංහලයින් තැනූ බදුල්ලේ කුඩා දේවස්ථානයේ ඇති පුවරුවෙහි "ඔහු අකුණක් වැද මියගිය බව" සටහන් කර තිබෙනු ඇසීම, රෝගර්ස් රොජර්ස්ගැන වූ පුරාවෘතය ගැන යලි සිතන්නට පෙළඹවීය.

එපමනක් නොව, ඇල්ල ටැම්පිට පත්තිනි දේවාලයද, බදුල්ල බණ්ඩාරවෙළ අතර සැරි සරන්නෙකුට දැකගතයුතුම තැනක් ලෙස සිතමි.

 ඉතාම කළාතුරකින් කමෙන්ට් එක දෙකක් සහිතව, දෙවසරක් පුරා අඛන්ඩව මේ තොරතුරු ජාලගත කල ඉන්දක වෙනුවෙන් තම සටහන් ඉදිරියටත් කරගෙන යාමට උත්තේජනයක්, අගය කිරීමක් කරන්න එකතුවෙමු යැයි ඔබෙන් අමුතුවෙන් ඉල්ලන්නට අනවශ්‍ය බව දනිමි.

අන්තර්ජාලයට අවශ්‍ය අප මෙන් ඕප දූප ලියන්නන්ට වඩා මෙවන් සොඳුරු මිනිසුන්ය. ඉන්දක, මේ සටහන ඔබට උපහාරයක් ලෙසමැයි!


මේ අඩවිය ගැන ඔත්තුව දුන් සින්දු ඇනෝටත් ස්තූතියි!

Saturday, December 13, 2014

පොඩි උන්ගේ ලොකු කතා..!


මේ දවස්වල හැම තැනම දේශපාළන ලිපි. ඒව කියවලම එපා වෙලා නිසා මම හිතුව අපේ පොඩි උන්ගෙ රස කතා ටිකක් ලියන්න කියන්න කියල.

මේ පොඩි අයගෙ කතා බ්ලොග් වල දානවට අපේ හාමිනේ මනාපත් නෑ. ඒත් ඉතින්, වෙනසකටත් එක්කත් කියල ලිව්ව.

මීට කලින් අපේ සිංහ බාහුගේ සිංහබාහුගෙ සිංහ ටෝක් කියවල නැත්තන්, ඉස්සෙල්ල මේව බලල එන්න.

සිංහ බාහුගේ සිංහ ටෝක්!

 

පුතා තාත්තාට පැම්පර් ඇන්දවූ හැටි!

 

පොඩි "පොඩි" වංචා


මේක අපේ ලොකුපුතා ලොකුබාහු පොඩි කාලෙ වෙච්චි සිද්ධියක්.

එතකොට කොළුවට වයස අවුරුදු තුනක් විතර ඇති.

ඒ කාලෙ උදේට එයාට කවන වෙලාවට තමයි අපේ කම්පවුන් එකේ කුණු ගෙනියන ට්‍රක් එක එන්නෙ. ඒ කහපාට ට්‍රක් එකෙන් බහින් කහ ඇඳපු මිනිස්සු දෙන්න අර කුණු දාන යකඩ බක්කිය තල්ලු කරල ට්‍රක් එක ගාවට ගෙනිහින් අමුනල, ඉන්පස්සෙ ඒක උස්සල ඇතුලට දාල, ආයි බක්කිය බාන ඔපරේෂන් එක මිනිහ හැමදාම බලන් ඉන්නව.

ලඟ ඉන්න කෙනෙකුට අපුලක් උනාට ජනේලෙන් බලන් ඉන්න අවුරුදු තුනක පැට්ටෙක්ට ඔය  වැඩේ මහ ලොකු දෙයක්. ඒ නිසා කම්පවුන් එකේ කුණු බක්කි තියෙන තැන් තුනටම ගිහින් ඒ මිනිස්සු ඒ වැඩේ කරනලකල් පොඩ්ඩ ජනේලෙ ගාවින් හෙල්ලෙන්නෙ නෑ.

පොඩි උන් කන්න හොරයි කියල දන්නවනෙ. අපේ ඈයොත් එහෙමම තමා. ඒ හින්ද පොඩ්ඩ ඕක බලන් ඉන්න අතරෙ එයාව බලාගන්න කෙනා කොල්ලට උදේ කෑම පිඟාන ගිල්ලවනව, මිනිහට නොතේරෙන්නම.

හැමදාම උදේ 8.30 විතර එන ඔය ට්‍රක් එක දවසක් මෙන්න 8 විතර ඇවිත්. සද්දෙ ඇහිච්චි ගමන් පොඩ්ඩ දිව්වලු ජනේලෙ ගාවට. ඉන් පස්සෙ මහ හය්යෙන් කෑ ගහනවලු මෙහෙම.

ඇන්ටී.... අන්න කුණු  තක් එක ඇවිල්ලා.....ඉක්මනට බබාගෙ බයි එක ගේන්න කවන්න...


බැලුවහම ඇන්ටි හිතුවට පොඩි උන් රැවටිල ඉන්නෙ කියල, ඇත්තටම රැවටිල ඉන්නෙ ඇන්ටිම තමයි කියලයි අපේ හාමිනේ මට පස්සෙ කිව්වෙ.

..............................................................................

දෙවනි සිද්ධිය...මේක උනේ මෑතකදි.

අපේ පොඩි පුතාව නර්සරියෙන් ප්‍රයිමරි එහෙකට දාන්න ඉන්ටර්වීව් එහෙකට එක්ක යනව.

වාහනේ ඉන්නෙ මමයි ලොකුපුතයි, පොඩි පැංචයි, හාමිනෙයි.

පාරට බැස්ස විතරයි සුපුරුදු විදියට ඔන්න ලොකු පුතාගෙ ප්‍රශ්ණ ඇසීමේ වැඩසටහන පටන්ගත්ත.

පුතා; තාත්තෙ ඇයි මල්ලිව අලුත් ඉස්කෝලෙකට දාන්නෙ?

මම; ඉගෙන ගන්න

පුතා; ඉතින් එයා මේ ඉස්කෝලෙත් ඉගෙන ගන්නෙ

මම; ඒ උනාට මේකෙ එයාට ඔයිට වඩා දේවල් උගන්නන්නෙ නෑනෙ. ඒ නිසා ලොකු ඉස්කෝලෙට දානව.

පුතා; ඉතින් එයාගෙ යාළුවො ඔක්කොම ඉන්නෙ මේකෙනෙ.

මම; එයා පුරුදුවෙයි අළුත් යාළුවන්ට.

පුතා; ඉතින් මල්ලිට මුලිම්ම උගන්නපු ඉස්කෝලෙ දාල යන එක පව්නෙ තාත්තෙ.

මම; ඔව්, ඒක තමයි එයාට අකුරු හෝඩිය කියල දුන්නෙ. එහෙම කියල ඒ ඉස්කෝලෙම හැමදාම හිටියොත් එයා දන්නෙ හෝඩිය විතරයි. ඉතින් එයාට කවදාවත් උගත් ලොකු මනුස්සයෙක් වෙන්න බෑ. වෙන්නෙ හෝඩිය විතරක් දන්න මෝඩයෙක්. එහෙම උනාම අපිට, එයාට වගේම ඒ ඉස්කෝලෙටත් වෙන්නෙ ලොකු වැරැද්දක්. ඒ නිසා එයා එතනින් එහාට යන්න වෙනව තව ඉගෙනගන්න.

පුතා; ඉතින් මල්ලි අලුත් ඉස්කෝලෙ ඉගෙනගත්තෙ නැත්තන්?

මම; එතකොට අම්මයි මමයි බලල එයාට උදව් කරල, සැර කරන්න ඕන උනොත් ඒකත් කරල එයාට ඉගෙන ගන්න උනන්දු කරනව.

පුතා; අම්මයි තාත්තයි එයාව උනන්දු නොකරොත්?

මම; පුතේ, අම්මල තාත්තල, ගුරුවරු, බලන්නෙ නැතුව අත්හැරල දැම්මොත් කිසිම ළමයෙක් හොඳ ළමයෙක් වෙන්නෙ නෑ. අම්මලගෙ තාත්තලගෙ වගකීම එයා ඉන්න ඉස්කෝලෙ හරි නැත්තන් වැරැද්ද හොයල බලල, අවශ්‍යනම් ඉස්කෝලෙ මාරු කරල දෙන්න ඕනෙ.  නැතුව ළමයින්ව ඉස්කෝලෙකට දාල, එතනින් පස්සෙ ඉතුරුටික දරුවටම තනියෙන් කරගන්න කියල  අම්මල තාත්තල  ඒ අයගෙ වගකීම පැහැර හැරැල, පස්සෙ ළමය නරක් වෙලා කියල දොස් කිව්වට හරියන්නෙ නෑ පුතේ.

බිරිඳ; ඇති ඇති, පොඩි එකාට ඔය ඡන්ද කතා තේරෙන්නෙ නෑ..!


Tuesday, November 25, 2014

මරා නොගෙන මෛතියෙන් මහින්ද රැක ගැනීම..!

ලාංකීය දේශපාළනය අතිශය තීරණාත්මක මොහොතකට එළඹ ඇත. කවුදො ඇනෝවෙක් කියා තිබූ පරිදි "රවි බෝපරා" සමග එංගලන්ත පිල ඉන්දියාවට ඉන්දියාවේදීම ගේම දීම" හෙවත්, නිදහස් පක්ෂ කණුවක් නිදහස් පක්ෂ කණුවක් බිම දැමීමට භාවිත කර ඇත.

පසුගිය කාලය පුරාම දේශපාලන විචාරකයින් පවසා තිබූ "මේ ආන්ඩුව වැටෙන්නේ ඇතුලත පිපිරුමකින්ම පමණි" යන්න මේ වනවිට සැබෑ වෙමින් පවතී.

මේ රටම කරකවා අත්හැර දැමූ සිද්ධිය "මාරයා, රංග" වැනි මහින්දවාදීන් පමණක් නොව "මාතලන්" වැනි "පැත්තක් නැතිඋන්ද" ගලගොඩ අත්තේලා වැනි අවස්ථාවාදීන්ද නන්නත්තාර කර තිබෙන සැටියක් පෙනෙන්නට ඇත.

මේ සටහනේ අදහස එවන් නන්නත්තාර වූවන් හෝ රනිල් ගොඩයාම ගැන "චූන් වී සිටින" කෙන්ජිලා ගැන සාකච්ඡාවට නොවේ. මේ ඒ සඳහා මොහොතද නොවේ. මෙහි අරමුණ, ජනාධිපතිවරණයේ පිටට නොපෙනෙන තීරනාත්මක සාධක කිහිපයක් ගැන සාකච්ඡා කිරීමයි.

මෙම ජනාපතිවරණය අප සිතනවාට එහා ඇති ජාත්‍යන්තර අතපෙවීම් සහ අවශ්‍යතා අනුව ක්‍රියාත්මක වන එකක් බවට පත්වෙන්න ඉඩ කඩ බොහෝ ඇත.

මහින්ද රාජපක්ෂ යනු, අතිශයින් චීන පිලේ සිටිනා සහ චීනයේ පිහිටෙන් තම පාලනය පවත්වාගෙන යන්නෙකි. එහි අනිවාර්‍ය ප්‍රථිඵලය ලෙස මේ වන විට චීනය තම අනාගත සතුරා වන ඉන්දියාව වටකොට සකසන යුධ සැලැස්මේ ප්‍රධාන මර්මස්ථානය ලෙස ලංකාව තෝරාගෙන, එය තුල බිලියන වලින් ආයෝජනය කරමින් සිටියි.

එවැනි මොහොතක, මහින්දගෙ බලය දෙදරවීමකට ලක්ව ඔහු නැවත බලයට ඒමේ අවස්ථාව අවදානමකට පත්ව තිබේ. මෙය චීනාට හිතකර තත්වයක් නොවේ. මෙවර මහින්දගේ විරුද්ධවාදියා වන්නේද චීන හිතවතකු වූ සරත් ෆොන්සේකා වැන්නෙකු නොව බටහිර සහ ඉන්දියානු පිලට වඩා හිතවත්, රනිල්ගේ මෙහෙයැවීමෙන් එන සිරිපාල කෙනෙකි. ඉතා පැහැදිලි ආකාරයට, මෙම සිරිපාළ මෙහෙයවන්නේ රනිල්, මංගල සහ චන්ද්‍රිකා ප්‍රමුඛ පිරිස වන අතර මේ සැවොම අඩු වැඩි ලෙසින් ඉන්දියාවේ සහ බටහිර හිතවතුන් වන අතර ඔවුන් චීන පිළෙහි ලඟ මිතුරන් නොවෙති.

තමන් ඉතාම සැළසුම් සහගතව, විශාල ආයෝජනයන් කරමින් අනාගත ආරක්ෂක මුරපොළක් ලෙස ගොඩනගමින් තිබෙන ලංකාවේ, මහින්දගෙන් පසු ගෝඨා හෝ නාමල් යටතේ එම තත්වය ඉදිරියට ගෙන යාමට බලා සිටින චීනයට මෙම සිරිපාළගේ අභියෝගය සුළුවෙන් තැකිය නොහැකි වනු ඇත.

එනිසා, චීනාට මහින්දගේ ජයග්‍රහණය හෝ පරාජය ලංකාවේ ග්‍රහණය දැඩිකර ගැනීම හෝ ලිහිල්වීම යන දෙකෙන් එකකි. ඉතාම ශූර ලෙස ලෝක බලවතා වීමේ සිහිනයට ලඟාවෙමින් සිටින චීනය, තම සතුරාගේ මිතුරාට තමගේ වටිනා ජයබිමක් පාවා නොදෙන්නට උපරිම බලය යොදනු ඇත.

අනෙක් පසෙන්, චීනා මර්ධනයටත්, තම රටවල් තුල ඇති ලක්ෂ සංක්‍යාත ද්‍රවිඩ ඡන්ද රැක ගැනීමටත් බටහිර රාජ්‍යන් විසින් මහින්ද එලැවීමට මේ ලද අවස්ථාව අත් නොහැර, සිය උපරිම සහය දෙනු ඇත.

කුමන ආන්ඩුවක් බලයේ සිටියද විදේදේශ සහ ජාතික ප්‍රථිපත්ති වල මහා වෙනසක් නොවෙනා ඉන්දියාවද මේ ගොඩට එක්වනු ඇත්තේ කාරණා කිහිපයක් නිසාවෙනි. ඉන් පළමු වැන්න, රාජපක්ෂ පාළනය දිගින් දිගට පැවතීම යනු චීනාට තම රට වට කර වැට ගැසීමට ඉතාම තදින් ඉඩ සළසා දෙන තත්වය වර්ධනයට ඉඩ දීමයි. අනෙක නම්, ලංකාවේ රාජපක්ෂ පාළනය පකිස්ථානය හා ඇති මිතුරුකමයි. මේ දෙකම ඉන්දියාවට අහිතකරය.

එවැනි වටපිටාවක ඉන්දියාව රාජපක්ෂලා නැවත බලවත් වීම නොඉවසනු ඇත. එපමනක් නොව, සිංහල බොදු ඡන්ද නම් ඉන්දියානු විරෝධී සාධකයේ ආධාරයෙන් බලය රැකගන්නා මහින්ද ඉදිරියේදී තව තවත් චීනාට ලංවන බව ඔවුනට නොතේරෙනවා නොවෙන නිසා, මහින්ද නැවත පත්වීමට එරෙහිව කල හැකි සියලු උපකාර කරන තත්වයකට ඉන්දියාව පත් වන්නේ රනිල් ප්‍රමුඛ රජයකින් මහින්දගෙන් තරම් තමන්ට අවැඩක් නොවන බව ඉතා හොඳින් දන්නා බැවිනි.

මෙහි අර්බුධය එතනින් නවතීද? කණගාටුවට කරුණ එය එසේ නොවිය හැකි බවයි.

මහින්ද පැරදී, චීනයට අකුලාගෙන යන්නට සිදුවන අවස්ථාවකදී, චීනය ඔවුන් අත මේ වනවිටත් ඇති විදුලිය සැපයීමේ අධිකාරියත්, අධික ණය කන්දත් යොදාගෙන තම උපරිම බලය යොදා එළඹෙන රජය අපහසුතාවයට පත් කරමින් සිය "තැන" රැක ගැනීමට කටයුතු කිරීමට බොහෝ සෙයින් ඉඩ තිබෙ. එහිදී තමන් ගෙන ආ රජයකට චීනාට යට වෙන්නට නොදෙන බටහිර සහ ඉන්දියානු කඳවුර විසින් තත්වය වඩා භයානයක සහ අසීරු අඩවියකට ගෙන එනු ඇත ( වර්ථමානයේ බටහිර ආසියාවේ සිදුව ඇත්තේද එවැනි යුරෝපා සහ රුසියානු බල අරගලයක් නිසා ඇතිවූ අර්බුධයකි. )

එමෙන්ම යම් ලෙසකින් මහින්ද ජය ගත්තේ නම්, එතැන් සිට ඔහුව බලයෙන් එලැවීමේ න්‍යාය පත්‍රය මා ඉහත සඳහන් කල මහින්දට සතුරු කණ්ඩායම විසින් නැවත ගෙන එනු ඇත.

ශ්‍රී ලංකාව වැනි, උගත් සහ ඉහල සේවා වියුක්තියක් ඇති රටක මිනිසුන් රජයට එරෙහිව අරාබියේදී මෙන් පාරට ගන්නට බැරි බව දන්නා ඔවුන්, තම අනෙක් අවිය වෙන ජාතිවාදය මෙහිදී භාවිත කිරීමට ඉඩ ඇත. ඉන්දියාව විසින් නැවත උසි ගන්වන දෙමළ ජාතිවදය සමග ඇමරිකාවේ අවශ්‍යතාව මත සෞදි සහ කටාර් රජයන්ගේ මුස්ලිම් ඔත්තුසේවා මගින් බලගැන්වෙන ජාතිවාදී අරගලයට ගිණි පිඹින්නට නෝර්වේ මුදල් මතින් රාජපක්සලාගේම අඥානත්වය නම් කරළියේ රඟ බොදු සේනාද එකතුවනු ඇත. එදා එක් පෙරමුණක සටන් කල ලංකාවේ හමුදාවට, වඩා සංවිධානාත්මක සහ ධනවත් කල්ලි දෙකක් සමග එක්වර සටන් කිරීමේ අර්බුධයකටද, ඒ මගින් පෙරලෙන රජය 2002 සිදූවූවාට වඩා එහා ගිය සාම ක්‍රියාවලියකින් සමනය කරගන්නට විරුද්ධපක්ෂය කරළියට ගෙන ඒමද සිදු වනු ඇත.

මෙනිසා, මහින්දගේ ජය හෝ පරාජය යනු අප සිතන තත්වයට එහා ගිය අර්බුධයකට රට පත් කරවන එකක් බව පැහැදිලිය.

මෙම අර්බුධයෙන් ගැලවීමේ මග මහින්දව බලයේ තබා ගැනීමද, සිරිසේන දිනවීමද?

ඕනෑම ගැටළුවකට වඩ සාර්ථක විසඳුමක් සෙවීමේදී එම අර්බුධයේ මූලය හඳුනා ගැනීම වැදගත්වේ.

ලංකාවේ තත්වය, එනම් චීනය විසින් අප නටවන ගැලළුවට මුල, යුධ අපරාධ චෝදනා සහ මානව හිමිකම් චෝදනාය. මහින්දගේ රජයකට මෙම චෝදනාවන්ගෙන් කිසිදා ගැලවෙන්නට නොහැක. එනිසාම ඔවුන් තම බලය පවත්වාගැනීමට පහසු ජාතිවාදය සහ විදුලිපුටුව විකුනනු ඇත.

පසුගියදා දෙමළ ඩයස්පොරා නායකයන් කලේ එවැනි කොන්ත්‍රාත්තු ප්‍රකාෂයකි. සත්‍ය වශයෙන්ම ඔවුන් දඩ බඩ ගා එවැනි ප්‍රකාෂයක් කලේ මහින්ද පැරදී රනිල් ආවිට තම යන්තම් නිදහස ලබමින් තිබෙන තම බැංකු ගිණුම් නැවත  ගල්වේයැයි බියෙන්, මහින්දගේ තුරුලේ සිටින කොටි නාම්බන් විසින් කරන ලද සැළසුම් සහගත වූ මහින්දට වාසිදිය හැකි ප්‍රකාෂක් ලෙස මිස මහින්ද සමග වූ සැබෑ අරෝවකට විය නොහැක!


එමෙන්ම නැවත යුද්ධයක් ඇති වුවද එය මහින්දට අවාසියක් මිස වාසියක් ඇති නොකරනු ඇත. මන්ද දැඩි ලෙස හමුදව දේශපාළනකරනය වී බල බිඳී ඇති වටපිටාවක මහින්දට නැවත සිවිල් යුධ ජයක් සිහිනයක් පමණක් වනු ඇති අතර, 2008 වැනි හමුදාවක් ඇතිවීමට තවත් වසර ගණනක යුධ ජය සහ පරාජයන් අවැසි වනු ඇත.

එනිසා කොයි පැත්තෙත් ගත්තත් තත්වය ලේසි වන්නේ නැත. ඉදින් විදුලි පුටුවෙන් මහින්දව සැබෑවටම බේරා ගැනීමටනම්, ඔහුව අනාගතයේ ඇතිවන වඩා අයහපත් ජාතිවාදී ගැටුම්, මර්ධන සහ මානව හිමිකම් වලින් ගලවා, පාළනය වඩා හොඳ අතකට පවරා දීම මිස, නැවත ඔහුව පත් කරගැනීමෙන් පසු මුදා හරින දැඩි මර්ධනයකට ඉඩ දීමෙන් නොවේ.

අනෙක් අතට මේ මොහොතේ සිදුවිය යුත්තේ වඩා සාධාරණ සහ විනිවිදබවකින් යුත් දේශීය අධිකරණයක් මගින් සිදු කරනු ලබන විභාගයක් හරහා යම් මේ කියනා යුධ අපරාධ ගැන සොයා බලා, ඒවාට මූලික වූ අයට තරාතිරම නොබලා යම් තරමකින් හෝදඬුවම් කිරීම, මානව හිමිකම් චෝදනා අවම වෙන යහ පාලනයක් ඇති කිරීම යන මූලික කරුණු තුලින්, ජාත්‍යන්තරයේ විශ්වාසය දිනා ගැනීමත්, එතුලින් අහිමිවී යන විදේශ ආයෝජන සහ වෙළඳ පල කොටස නැවත හිමි කර ගැනීමත්, ඉන් ලැබෙන ආර්ථික සහයෙන් චීන බලපෑම අවම කර ගැනීමත්ය.

එනිසා ජනතාව කල්පනාකාරීව ඒ සඳහා සුදුසු නායකයින් පත්කරගත යුතුය. අවසානාවකට, එවන් දැක්ව්මක් සහ අවශ්‍යතාවක් නැති ජාතියක්, රටක් වන හෙයින්, අප වහා කල යුත්තේ බ්‍රෙෂ්ට් කීවාක්සේ "එවන් හැකියාවකින් යුක්ත ජනතාවක් මුලින්ම පත් කරගැනීමයි".

Picture taken from http://www.wikiart.org/en/jose-gutierrez-solana/drawing-for-the-end-of-the-world

Thursday, November 20, 2014

ආදරණීය වික්ටෝරියා


පළමු කියැවීම - 2014 නොවැම්බර් 19

ආදරණීය වික්ටෝරියා කියවන්න ගත්ත. තාම පරිච්ඡේද දෙකයි ඉවර. රෑට ගෙදර ගිහින් ඉතුරු ටික බලන්නෙ. හැබැයි මුල ටිකක් අවුල් වගේ. යන්නෙ පැයට මයිල් හැටේ වේගෙට.

අන්දිරිස් කොළඹ එනව ජීවිතකාලෙම හම්බු කොරපු සල්ලි යාලුවෙක් ගාව තියල ( ඒකට හේතුව පස්සෙ මතුවෙයිද? ). පානදුරේ ගෙදර වැඩ අස්සෙ බොන්නෙ බෙලිමල්, රණවරා! නැදුන් මිල්ල ගස් මතුගම පැත්තෙ කැලෑ වලින් කපනවලු! අච්චර ලොකු අරක්කු ව්‍යපාරෙ කරන ඩබල ඔය තරම් සෙනගක් ඉන්න ව්‍යාපාරයක් පාලනයට ගිණුම් මිණුම් තියාගත්තෙ කොහෙද කොහොමද!

මේක අර "මාගම් සෝලිය" වගේ අධියථාර්ථවාදී හිතළුවක් උනානම් ගානක් නෑ, ඒත් එහෙමම නොවෙන එකේ...!

අනේ මන්ද, බලමු පොත කියල ඉවරවෙනකොට ප්‍රශ්ණ වැඩි වෙයිද නැත්තං මේ ටිකවත් විසඳෙයිද කියල!

දෙවැනි කියැවීම - නොවැම්බර් 20

මම මාගම් සෝළිය කියවූයේ එය ගැන පූර්ව කියැවීම් වලින් තොරවය. එනිසාදෝ එහි ඉතිහාසය ගැන තාක්ෂනික කරුණු නොසොයා මොහාන් මවා තිබූ මයා යථාර්ථයේ කිමිදෙමින් ඉතිහාසයේ ඛේදවාචකයක්, ඓතිහාසික පරාජයක් ගැන වික්ටෝරියානු සදාචාරයට පෙර පැවති සිංහලයාගේ වැරදීම් සහ අඩුපාඩු ගැන පෙනෙන මානයට එහා ගොස් කියා තිබූ අපූර්වත්වය විඳින්නට හැකිවිය.

නමුත් ආදාරණීය වික්ටෝරියා කියැවීමට පෙර ඒ ගැන නොයෙකුත් දෙනා කල අගයකිරීම්, ඔසවාතැබීම් මතින් නිසා, පොත කියැවීමට පටන්ගත් මොහොතේ පටන් යටි සිත සොයා ගත්තේ කතුවරයට වැරදී තිබූ තැන් පමණි.

නමුත් පොත අග වනවිට තත්වය වෙනස් වෙමින්, කතුවරයා මායාව මතින් ලාංකික දේශපාලනයේ පසුකාලීන නියමුවන්ගේ ආරම්භයත්, ඔවුන්ගේ ගන්ධබ්බ ඇවතුම් සහ පැවතුම් පිළිබඳවත්, සදාචාරයන් දෙකක් අතර දෝළනය වූ ආශාවන් සහ හැඳීමුත් කදිමට නිරූපණය කර තිබෙනු දුටුවෙමි.

මෙහි රේන්දරාළලා ගැන හෝ රේල්පාර නිමැවීම ගැන වූ කරුණු සහ වඩු කර්මාන්තය ගැන ඔහු සෑහෙන දුරට හැදෑරීමක් කල බව පෙනෙතත් අඩුපාඩු එමට වූ බව නොකියා බැරිය. නමුත් ඔහු සිය කෘතියෙන් පෙන්වන, එදා පන්තිය වෙනස් කල මිනිසුන්ගේ අර්බුධය පිළිබඳ කියැවීම විඳින්නට භාධාවක් කරගත යුතු නැතයි යෝජනා කරමි.

අවසානයේ දිගු කතාවක් කෙටියෙන් කියන්නේනම්, ආදරණීය වික්ටෝරියා තුලින් මා එදා තම රටට පැමිණි සංස්කෘතියෙන් සහ අර්ථ ක්‍රමයෙන් වෙනස් වූ මිනිසුන්ගේ කතාව පමණක් නොව මෙදා තම රටින් බැහැරව වෙනස් අර්ථ ක්‍රමයක් සහ සංස්කෘතියක් සහිත දේශයන්ට සංක්‍රමණය වූ මිනිසුන්ගේ කතාවද කියැවීමි!

Wednesday, November 12, 2014

වලා සහ ලිංග හමුව.!



බහුවාර්ගික ජනතාවක් වෙසෙන රටවල සිටින්නන්ට, සංනිවේදනයේදි කදිම අකරතැබය්න්ට මුහුණ දීමට සිදුවේ. එකම ජාතියක, එකම බසක් කතා කරන මිනිසුන් අතර වුව එවන් අවස්ථා දුලභ නොවන කල, බහු වාර්ගිකයන් අතර එය කෙතරම් දැයි, එවන් රටවල වෙසෙන, වෙසුනු අයට බොහෝ රසවත් අත්දැකිම් තිබෙනු ඇත.


මේ මා වෙසෙන අරාබි කොදෙව්ව තුල අත් දුටු එවන් සිදුවීම් කිහිපයකි.

මීට වසර කිහිපයකට පෙර මා දැන් සේවය කරන "ග්‍රීක" ජාතිකයන්ට හිමි ආයතනයට බැඳුනු මුල්ම දින සිදුවීමකි.

ඒ ආයතනයේ මා හට අදාලවූ අංශයෙහි සතියක පමණ නිරීක්ෂනයකින් පසු හඳුනාගත් අඩුපාඩු සහ ඒවා නිවැරදිකිරීමට යෝජනා සහිත වාර්ථාවක් සකසන ලෙස අධ්‍යක්ෂකමණ්ඩලයෙන් ලද අණ අනුව, අදාල වාර්‍තාව සකසා, එය සාකච්ඡාවට ගන්නා මොහොතයි. ඒ වනවිටත් මා නිරීක්ෂනය කර තිබු පරිදි ආයතනයේ ග්‍රීකයන් බහුතරයගේ ඉංග්‍රීසි දැණුම සහ කතාව "පොලිෂ්" නොවුනත් එහි කිසිවෙකු ඒ ගැන තැකීමක් නොකර, සංනිවේදනය මූලික කරගත් ග්‍රීක් ඉංග්‍රීසි මිශ්‍ර බසකින් බොහෝ විට සංවාද කරගෙන ගියහ.

අප ආයතනයේ මෙහෙයුම් කළමණාකරුව සිටියේ වයස 50 පමණ වූ, පෙණුම ඊට බොහෝ වැඩි "දිනෝස්" නම් ග්‍රීකයෙකි.

මගේ රාජකාරිය ඔහුගේ වගකීම් වලින් කඩා දුන් කොටසක් වූ අතර, යම්කිසි හේතුවකට මා වැනි "ඉන්දියානු කල්ලෙකු" ඒ තණතුරට බඳවාගැනීම ගැන නොසතුටින් සිටි ගතියක් මට මුල් දිනම දැණුනි ( හෝ දැනෙන්නට සැලැස්විනි ).

ඉතින් අප අතර සිදුවන සංවාදයන්හිදි මම විශේෂයෙන් පරෙස්සම් වීමට සිදුවිය.

මේ කියන දිනත්, අදාල වාර්ථාව සමාලෝචනය සඳහා ආයතනයේ මෙහෙයුම් අධ්‍යක්ෂවරයා, මහ කළමණාකරු, මා, සහ ඉහත කී මෙහෙයුම් කළමණාකරු සහභාගී වී සිටියහ.

වාර්ථාවේ මූලික අංගය වූ "ගැටළු" කොටස මුලින්ම ඉදිරිපත් කරන ලදි.

ඉන් පසු ඒ ගැන එක් එක් අය අදහස් පළකල අතර, අධ්‍යක්ෂවරයා විසින්,

"දිනෝ, ඩූ යූ හෑව් එනිතින්ග් ටු සේ අබවුට් හිස් ෆයින්ඩින්ග්ස්?"

ලෙස විමැසීය. මේ ඉන් පසු වූ සංවාදයයි.

Dino - ඉට්ස් ඔකේ...මිස්ට ඉන්දිකා හෑස් ඔබ්සර්ව්ඩ් වෙල් ඇන්ඩ් අයැම් ඇන්ග්‍රි විත් ෆිව් තින්ග්ස් බට් මෙනි අයිටම්ස් වී හැව් ටු සී අගේන්.
Me - මිස්ට දිනෝස් මේ අයි නෝ ද පොයින්ට්ස් යූ ගොට් අප්සෙට් ?

Dino - නෝ නෝ... අයැම් නෝට් අප්සෙට්, අයි ඇන්ග්‍රි..ඇන්ග්‍රි

Me - ඉයෙස්, ලෙට් මී නෝ වටා දෝස් පොයින්ට්ස් යූ ගොට් ඇන්ග්‍රි?

Dino - නෝ මයි ෆ්‍රෙන්ඩ් අයැම් නොට් ඇන්ග්‍රි, අයි සෙයිඩ් ඇන්ග්‍රි... ( ඉන් පසු අධ්‍යකෂක දෙසට හැරී ග්‍රීක් බසින් යමක් කියයි )
එවිට අධ්‍යක්ෂක; නෝ නෝ ඉන්දික, හීස් නොට් ඇන්ග්‍රි, හී ඇග්‍රී විත් සම් පොයින්ට්ස්.

...෴......෴.....෴......෴......


දෙවැන්න මෑතකදී එක්තරා සැපයුම් කරුවෙකුගේ කාර්‍යාලයෙන් මා ඉල්ලා යැවූ තාක්ෂනික වාර්ථාවක් පිළිබඳ ලද ඇමතුමකි.

ඇමතුම කාන්තා හඬකිනි. සංවාදය මෙලෙස විය ;

හෙලෝ, මිස්ටර් ඉන්දිකා..

යෙස්...ස්පීකින්

සර් දිස් ඊස් "වලා" ෆ්‍රොම් මැසී ඉන්ටර්නැෂනල්..

( සිනහව ගිලිමින් ) ඉයෙස් වලා...හව් ආර් යූ ?

පසුව දැනගත් පරිදි "වලා" යනු අරාබි කාන්තා නමක් වන අතර එහි තේරුම "පක්ෂපාතී, විශ්වාසවන්ත" යන්නයි.

....෴......෴.....෴......෴......
 
තෙවැන්න පිළිපීන ජාතික පිළිගැනීමේ නිළධාරිනිය සහ මා අතර විය.

හෙලෝ...ඕ..ව්.. ඉන්දිකා..

යෙස් ජැස්මින්..

වන් මිස්ට ශුක්‍රා..ලිංග හෑස් කම්....!!

පසුව දැනගත් පරිදි සොක්කලිංගම් නමැති ඉන්දීය ජාතිකයකු මා හමුවීමට පැමිණ ඇත..!

Saturday, November 1, 2014

සිංහලයාගේ උණු වීම සහ උණුකරවායාම! Aids and aids!


රටම නොව ලොවම කම්පා වූ ඛේදවාචකයක් සිදුව ඇත. අසරණ මිනිසුන් නොදන්නා ගණනක් මිහිදන්ව ඇති මොහතක, යළිත් සිංහලයාගේ සුපුරුදු කාරුණික හදවත උණුවෙමින් පවතී. සිංහලයා යනු ආධාර වලින් යැපෙන්නත් ආධාර දෙන්නටත් උපන් හපන් කමින් යුත් අපූරු ජන කොටසකි.

බුකිය පුරා සනීපාරක්ෂ්ක තුවා, යට ඇඳුම් සඳහා ආධාර එකතු කරන්නන්ය. රේඩියෝ චැනල් වල මණුසත් කම් මීරියබැද්දට දෝරෙ ගලා යාමට පටන්ගෙන ඇත.

දිය යුත්ත හා නොදිය යුත්ත ගැන අදහසක් ඇතිව හෝ නැතිව ඔවුන් ආධාර එකතු කරති. මේ සිදුවීම් මට සිහි කරන්නේ වසර දහයකට පෙර සුනාමියේදී මා පුද්ගලිකව අත් දුටු සිදුවීම් කිහිපයකි.

මා පෙර සටහන් කල පරිදි, සුනාමිය ගැන මම දැනගන්නේ දෙසැම්බර් 26 දින සවස් වරුවේය. ඒ මොහොතේ අප රැඳී උන් "වැද්දාගල" නවාතැනින් පිටත්ව රත්නපුරය හරහා කොළඹ ඒමට පිටත් වූයේ 27 වන දින උදෑසනිනි. අප එන මග දිගට, රත්නපුර, කුරුවිට ඇහැලියගොඩ නගරවල රථ පේලි ආධාර එකතු කරමින් තිබෙනි. ඒ වනවිටත් යම් මාර්ග තදබදයක් ඇති කරමින් එම නගරවල සිදුවූ "සත් ක්‍රියාව" දැක ගනිමින් රත්මලානට පැමිණි අප, හිස ගිණිගෙන හික්කඩුවට යාමට පිටත් වූයේ එදිනම, එනම් 27 සවසමය.

ඒ වනවිට ගාළු පාර පාළුවට ගොස් තිබු අන්දම ගැන මා පෙර සටහන් කර ඇත. එලෙස පාළුවට ගිය ගාළු පාරෙ හික්කඩු ගොස්, මීටියාගොඩ, අළුත්වෙල, ගෝණාපිනූවල ඈ හැම අස්සකම තිබූ අනාථ කඳවුරු රෝහල් වල අප පවුලේ අයව සෙවීම නිසා, 29 දින උදෑසන වන විට මගේ මෝටර් රථයේ ඉන්ධන ටැංකිය රතු කට්ට අසන්නයට පැමිනෙමින් තිබුනි.

නමුත්, ප්‍රවහාන මාර්ග අඩපන වී තිබීම නිසා ඒ වනවිට දකුණේ සියලු ඉන්ධනහල් එක්කො වසා, නැතිනම් දිගු පෝළිම් වල ඇති යතුරුපැදි වලට පමණක් ඉන්ධන නිකුත් කිරීමකට සීමා වීය.

ඒ වනවිටත් අතුරුදන්ව සිටි පවුලේ සාමාජිකයන් එකකු හෝ හමුවී නොතිබූ නිසාත්, කෙසේ හෝ ඔවුන්සොයාගැනීමෙන් පසු නැවත කොළඹ යායුතු නිසාත් අපේ ඉන්ධන අවශ්‍යතාවය ඉතා දැඩිය.

විකල්ප දෙකක් තිබුනි. එකක් නම් නැවත කොළඹ අවට ඉන්ධන ඇති පෙදෙසක් වෙත පැමින, ටැංකිය පුරවාගෙන ආපසු ඒමයි. දෙවැන්න කොළඹ දෙසින් එන්නෙකු අත පැට්‍රල් කෑන් එකක් දෙකක් ගෙන්වා ගැනීමයි.

අප මුලින්ම දෙවනි යෝජනාව ක්‍රියාත්මක කරන්නට සිතුවෙමු.

මගේ මිතුරන් කිහිප දෙනෙකුටම ඇමතූ මුත්, ඔවුන් හෝ දන්නා කෙනෙකු ආධාර ගෙන දකුණට නොඑන බව දැනගන්නට ලැබුනි.

තත්වය බරපතලය. වහා කණඩායමක් සොයා ගතයුතුවිය.

"ඉන්නකො බලන්න මම අපේ ඔෆිස් එකේ අයට පොඩ්ඩක් කතා කරල බලන්න. සමහරවිට ඒගොල්ලො මොනව හරි ඕගනයිස් කරල ඇති" යැයි කියූ බිරිඳ මගෙ අතින් මොබයිල් එක ගෙන ඇගේ මිතුරෙකුට ඇමතීය.

මුල සිට අප සිටින තත්වය විස්තර කර, අනතුරුව ඔහුගේ ප්‍රශ්ණ විචාරත්මක වැඩසටහනත් අවසන, අප අවශ්‍යතාවය පවසන ලදි.

ඇය ලද පිළිතුර ඊට තරමක් වෙනස් එකක් විය.

"කොළඹ අවට කොහෙවත් කඩවල හිස් කෑන්, බූලි වතුර බෝතල් ගන්න නෑලු. ඒගොල්ලොත් හොයල වතුර ගේන්න. නැති තැන බෙහෙතුයි ඇඳුනුයි අරගෙන හවසට එනවලු!"

මේ අතර අප හා සිටි බිරිඳගේ සහෝදරයාටත්, මගේ මිතුරු අමිලටත් ඔවුන් ඇමතූ ඇමතූ මිතුරන්ගෙන් ලැබී තිබුනේ සමාන පිළිතුරුය.

එන උන් එක්කෝ පිටවෙලා මග ඉන්නෙ, නැතිනම් හිස් බූලි නැත!

"අපි ජගාට පොඩ්ඩක් කතා කරල බලමුද?"


ජගත් යනු මගේ හොඳ මිතුරෙකු වන අතර, හොරණ ප්‍රදේශයේ විසූ ඔහු අවට ජනප්‍රිය චරිතයක් විය. අනුන්ගේ දුකේදී උදව් කිරීමට ඉතා කැමැත්තෙන් ඉදිරිපත්වන චරිතයකි. නියත වශයෙන්ම ජගත් තම කෲ කැබ් රථයේ යම් දෙයක් පුරවාගෙන මිතුරන් කිහිපදෙනෙකුන් සමග විපතේදී දකුණට එන බවට අපට විශ්වාසයක් විය.

මම ජගත් ඇමතුවෙමි!

"ජගා, උඹ කොහෙද ඉන්නෙ. මට පොඩි උදව්වක් ඕනෙ"

"මචං අපි හොරණ ඉන්නෙ මොකද්ද වෙන්න ඕනෙ?"


ඒ වන විට මම සිටිනා ස්ථානයත්, අප පවුලේ අය මුහුන පා සිටින තත්වයත් සඳන් කර,

"උඹල මේ පැත්තට එනවනං බැරිද මට පැට්‍රල් කෑන් දෙක්ක ගෙනත් දෙන්න. මම සල්ලි දෙන්නම් මෙහෙදි"

"අනේ මචෝ, මෙහෙ තීනත තරමක් කෑන් එකතු කරල වතුර පුරවල ඒව අරන් මේ එන්න හදන්නෙ. දැන් මම හිතන්නෙ නෑ හිස් කෑන් එකක් හොයාගන්න පුලුවන් වෙයි කියල"

"ඉතින් ඔය වතුර කෑන් එකක් හලල පැට්‍රල් දාගෙන වරෙන්කො"

"අපෝ එක කරන්න බෑ බන්, මුන් මගෙ ඔළුව කාවි. ඔහෙ මිනිස්සුන්ට බොන්න වතුර නෑ කියල වතුරම තමයි අපි වැඩියෙන් ගත්තෙ. ඉතින් ඒ එකක් දෙකක් හලල පැට්‍රල් පුරෝ ගත්තොත් මේ උදව් කරපු උන් මාව කයි.උඹ තරහ වෙන්න එපා, පොඩ්ඩක් බද්දෙගම පැත්තට ගිහින් බලහන් පෙට්‍රල් ටිකක් හොයා ගන්න, මටගේන්න විදිහක් නැහැ මචන්"


ආධාර කණ්ඩායමකින් ආධාර බලාපොරොත්තු වීම එතකින් අවසන් විය.

අවසානයේ, එකම විකල්පය වූ කොළඹ පැමින ඉන්ධන පුරවා නැවත යමට අපිට සිදුවිය. එයද සිතූ තරම් පහසු නොවූයේ, ලොරියක නැගි දහ පාලොස් දෙනා වතුර බූලි, පරණ ඇඳුම්, නොයෙකුත් අවශ්‍ය/අනවශ්‍ය දේ රැගෙන ගාළුපාර දිගේ දකුණට ගලමින් තිබූ නිසාවෙනි. ඒ ආ බොහෝ දෙනෙක් කොහෙන් හෝ එකතු කරගත් යමක් රැගෙන දකුණට පැමිණ තිබුනේ "සුනාමි බැලීමට" තිබූ නොතිත් ආසාව ආධාර වලින් වසාගෙන බව අප හොඳින්ම දැන සිටියෙමු.

මන්ද, ඒ දානපතියන් ගෙයක මඩ ටිකක් හෝ අස් කරන්නට උදව් නොවී, අනාතකඳවුරක කුණුවලක් හෝ කපන්නට උදව් නොවී තමන් ගෙන ආ කඩමාලු සහ වතුර බූලි දමා, වටපිට සිරි නරඹා ආපසු ගොස් තිබුනේ සැබැවින්ම අවශ්‍ය දේ රැගෙන එන සැපයුම් ප්‍රමාද කරමින්, මහමඟ පැය ගනන් දිගු රථවාහන පෝලිම් සදමින්, ලක්ෂ ගණනක ඉන්ධන නිකරුනේ දවමිනි.

එපමනක් නොව, අනාත කඳවුරු දොරකඩ "පරණ ඇඳුම එපා", ප්ලාස්ටික් වතුර බෝතල් එපා" වැනි බෝඩ් ගස්සවන්නටද, පරණ කඩමාලු කොත් සාදවන්නටද ඔවුන් සමත්ව තිබුනි!

මෙනිසා, චාරයකින් තොරව, කල්ලි ගැසී මොනවා හරි රැගෙන යන මෙවන් බෝ-සතුන් මීරියබැද්දේ නොයා සිටීම සැබෑ ලෙසින් ආධාර දෙන ආයතන වලට සහ රජයට කෙරෙන උපකාරයක් මෙන්ම ඒ ගම්මුන්ට කරන උපකාරයක්යැයිද වන බව මම සිතමි.

එහෙත්, යම් කිසිවෙකුට සැබැවින්ම කිසියම් ආධාරයක් ඔවුන්වෙනුවෙන් කල යුතුමනම්, තව දෙමසකින් එන නව වසරේදී ඒ කුඩා දරුවන්ට සෙල්ලම්බඩුවක් රසකැවිල්ලක්, අලුත් ඇඳුමක් රැගෙන එහි ගොස් එන්න. මන්ද ඒ වනවිට මේ "රැල්ළ" බැසගොස් ඔවුන්ව අමතකව තිබීමට හැකි බැවිනි!

Monday, October 27, 2014

සුභ දවස ගැන දැනගන්න කෙටි මගක්..



තාක්ෂනික අවුලක් නිසා දාපු පෝස්ට් එක අප්ඩේට් නෑ. ඒ නිසා මේ පාරෙන් එන්න.

සුභ දවසක්....විශේෂ දවසක්...!! A Party Day...!!!




සුභ දවසක්....අද විශේෂ දවසක්. ඒකට හේතු කිහිපයක්...!!!




පළවෙනි එක, කොල්ලො තුන් දෙනෙක් එක්ක හැදුනු, කන් විදපු මුත් අපේ පවුලෙ බාල කොල්ලා වෙච්චි, පුන්චි කාලෙ තරහ ගස්සන්න පූගොඩ පෙහෙකම්හලේ G ගොඩක් නොවුන Gවන්ති කියල කියාපුඅපේ ආදරණීය ඉබ්බී නොහොත් මගේ එකම නංගිගෙ උපන්දිනේ අද.
 




ඊලඟට බ්ලොග් ලෝකෙ! මගේ බ්ලොග් ලෝකෙ මුල් ගුරු වෙච්චි, තම පහණින් පහන් සිය ගණනක් දැල්වූ, පුක යනු කුණුහරුපයක් නොවන බවත්, පාරෙ හමුවන කෙනෙකු නිසා රටක් ආගමක් වෙනස් කල බවත් මතක් කර දුන් "මහා බ්ලොග් කරු - හිටපු" කතන්දරකාරයාගේ උපන්දිනය වීම.




වගේම, මල් වැටෙන සෝස පාට බ්ලොග් වල දකින, මූණු පොතේ නිළ රැකියාවත්, පාර්ට් ටයිම් ගණකාධිකාරි ජොබක් කොළඹ ලොකු හෝටලයකත් කරන, තරු නොහොත් තාරක ඉඳිකැටියගෙ උපන්දිනයත් අද.

ඒ විතරක් නෙමෙයි,
ෂර්වුඩයෙ රොබින් වගේ කෙහෙල්කොටුවට පැනල කෙසෙල් ගස් පෙති ගාපු, හුරතලේට ඌරු පැටියෙක් හදාපු, පෙනුමෙන් නීළමහා යෝධය වගේ උනාට සිතින් සහ ක්රියාවෙන් චූටි මහත්තය වෙච්චි බුද්ධි ප්‍රසාද්ගෙත් උපන්දිනය අද

ඉවරද? නෑ තව තියෙනව.
කලක් බ්ලොග් පාඨකයන්ට ඇඬෙන්න ලියපු, තම ජීවිතේ සත් ආදර කතාව ප්රබන්ධයකට වඩා රසවත් වෙච්චි, උදව් කිරීම යුතුකමක් නොව වගකීමක් විදිහට ක්රියාවෙන්ම ඔප්පු කල, අද වනවිට බ්ලොග් යනු කුමක්දැයි නොදන්නා, දුකා නොහොත් සුභාෂ් ගුණවර්ධනගෙ විවාහ සංවත්සරය.

ඒ සුභ දේ වගේම ඔක්තෝබර් 27 මට වැදගත් තවත් එක් හේතුවක් නිසා.

මීට අවුරුදු විස්සකට කලින් අද වගේ දවසක තමයි මමයි, තව ගැටව් හත් අට දෙනෙක් එක්ක ගැටිස්සියො තුන් දෙනෙක්, එතෙක් මෙතෙක් මම ගිය දීර්ඝතම දුම්රිය ගමණ නිමා කරල යන්න එන්න කන්න බොන්න දෙය්යක් නැතුව කොළඹ හතේ බෞද්ධ මහා සම්මේලන රිය ගාලෙ ලිපක් බැඳල හරිශ්චන්දර නූඩ්ල්ස් වලට සෝයාමීට් දාල තම්බන් හොදි, මිරිස් ලුනු නැතුව තමබගෙන කාල, ජීව්තේ ගතකරපු දුෂ්කරම දවස් කිහිපයක් ඉවර කරල ගෙදර ගිය ඒ අමතක නොවෙන දවස.



නමුත් මේ අන්තිම කරුණට සතුට එක්ක මුසු වෙච්චි දුකකුත් තියෙනව!!


මූණු පොතේ නැතුව මේ අයට බ්ලොග් වලින් සුභ පතන්න හිතුවෙ, මේ අය හැමෝම මේ වෙනකොට බ්ලොග් අතෑහැරල මූණු පොතේ ගාල් උන්ත, අපි අමතක කරල නැති බවත් මතක් කරන්න.

LinkWithin

Related Posts with Thumbnails